තියුණු ආයුධයකින් ගෙල කපා පිහියකින් ඇන නිදියහන මත ඝාතනය කර තිබූ බියගම, පේරගස්හන්දිය, මල්වත්ත පාර ප‍්‍රදේශයේ පදිංචි තිස්නව හැවිරිදි කාන්තාවකගේ මළ සිරුරක් බියගම පොලිසිය විසින් පෙරේදා (24 දා) පස්වරුවේ සොයාගෙන ඇත.

 මෙසේ ඝාතනය කර තිබුණේ නදීකා කුමාරි රත්නායක (39) නමැති එක් දරු මවකි. ඇය පෙරේදා (24 දා) පෙරවරුවේ සිය එකොළොස් හැවිරිදි දරුවා පාසල වෙත ඇරලවා පැමිණ නිවසේ තනිව සිට ඇති අතර ඇගේ ස්වාමියා ද රැකියාව සඳහා පිටත්ව ගොස් ඇති බව ද පොලිසිය පවසයි.

 ඝාතනයට ලක්වූ කාන්තාවගේ දරුවා පාසල නිමවී නිවසට පැමිණි විට ඔහුගේ මව ඇඳ මත ඝාතනය කර තිබූ අයුරු දැක අසල්වැසියන් මාර්ගයෙන් පොලිසියට දැනුම් දී ඇත.

 ඝාතනය සිදු වූ ස්ථානයට පෙරේදා (24 දා) සවස පැමිණි මහර මහෙස්ත‍්‍රාත් අධිකරණයේ වැඩබලන මහෙස්ත‍්‍රාත් නිමල් පතිරණ මහතා විසින් මහෙස්ත‍්‍රාත් පරීක්ෂණය පැවැත්වූ අතර, රාගම රෝහලේ සහකාර අධිකරණ වෛද්‍යවරුන් වන තනුශාන් මුතුලින්ගම්, නිරංග සේනාරත්න හා මලීෂ ජයසුන්දර යන මහත්වරු විසින් ඝාතනය වූ ස්ථානයට පැමිණ මූලික නිරීක්ෂණ කටයුතු සිදු කළහ.

 මහෙස්ත‍්‍රාත්වරයාගේ නියමයෙන් දේහය පශ්චාත් වෛද්‍ය පරීක්ෂණ කටයුතු සඳහා රාගම රෝහලට රැුගෙන යන ලදී.

 කැලණිය ජ්‍යෙෂ්ඨ පොලිස් අධිකාරි රොෂාන් ඩයස්, සහකාර පොලිස් අධිකාරි සමන් පුස්වැල්ල යන මහත්වරුන්ගේ අධීක්ෂණයෙන් බියගම පොලිසියේ වැඩබලන ස්ථානාධිපති ප‍්‍රධාන පොලිස් පරීක්ෂක කේ. එන්. සිරිමෙවන්, කැලණිය කොට්ඨාස අපරාධ ස්ථාන පරීක්ෂණාගාරයේ ස්ථානාධිපති, ප‍්‍රධාන පොලිස් පරීක්ෂක කේ. බී. කහපිටිය, අපරාධ අංශයේ ස්ථානාධිපති රාජපක්ෂ, අධිකරණ කටයුතු භාර පොලිස් පරීක්ෂක ඒ. එම්. කේ. තිලකනාත් යන මහත්වරුන් විසින් වැඩිදුර විමර්ශන කටයුතු සිදු කරති.

- දිවයින