පාස්කු ඉරිදා සිනමන් ග්‍රෑන්ඩ් හෝටලයට එල්ල කළ මරාගෙන මැරෙන බෝම්බ ප්‍රහාරයේ බෝම්බකරු වන මොහොමඩ් ඊබ්‍රහිම් දුෂ්‍යාත් අහමඩ් හා ෂැංගිලා හෝටලයට එල්ලවූ මරාගෙන මැරෙන බෝම්බ ප්‍රහාරයේ බෝම්බකරු වූ මොහොමඩ් ඊබ්‍රහිම් ඉල්හාම් අහමඩ් යන බෝම්බකරුවන් සමඟ බෝම්බ ප්‍රහාරවලට අදාළ සබඳතා පැවැත්වූයේ යැයි මේ වන විට රැඳවුම් නියෝග මත රඳවා තබාගෙන ප්‍රශ්න කරන නීතිඥ හිජාස් හිස්බුල්ලා යන අය මේ මස 24 වැනිදා හඳුනා ගැනීමේ පෙරෙට්ටුවක් සඳහා සහභාගි කරවන ලෙසට අපරාධ පරීක්‍ෂණ දෙපාර්තමේන්තුවට කොළඹ, කොටුව මහෙස්ත්‍රාත් රංග දිසානායක මහතා ඊයේ (18දා) නියෝග කළේය.

මහෙස්ත්‍රාත්වරයා එලෙස නියෝග කළේ අපරාධ පරීක්‍ෂණ දෙපාර්තමේන්තුව වෙනුවෙන් නීතිපතිවරයා නියෝජනය කරමින් අධිකරණයේ පෙනී සිටි නියෝජ්‍ය සොලිසිටර් ජනරාල් දිලීප පීරිස් මහතා අධිකරණයෙන් කළ ඉල්ලීමක් සලකා බැලීමෙන් අනතුරුවය.

ඊට අමතරව නඩුවේ සාක්‍ෂිකරුවන් වන නීතිඥ හිජාස් හිස්බුල්ලා යන අයගේ මූලිකත්වයෙන් පවත්වාගෙන ගිය “සේව් ද පර්ල්” නමැති පුණ්‍ය ආයතනය මඟින් පුත්තලම ප්‍රදේශයේ පවත්වාගෙන ගිය “අල් සුදරියා” නමැති මද්‍රසා පාසල් පරිශ්‍රයේ පවත්වාගෙන ගිය දේශනවලට සහභාගි වූ දරුවන් 10 දෙනකුට එදින (24දා) හඳුනා ගැනීමේ පෙරෙට්ටුව සඳහා ඉදිරිපත් වන ලෙසටද කොටුව මහෙස්ත්‍රාත්වරයා සිතාසි නිකුත් කළේය.

අදාළ පාසලේ පැවැත්වූ දේශන සඳහා වාර ගණනාවක් නීතිඥ හිජාස් හිස්බුල්ලා නමැති අයකු පැමිණ ඇති බවට දරුවන් ප්‍රකාශ කර ඇති බවද අදාළ දරුවන් 10 දෙනා එම නම හඳුනන බවට ප්‍රකාශ කර ඇති බවට නියෝජ්‍ය සොලිසිටර් ජනරාල්වරයා අධිකරණයට සැලකර සිටියේය.

අදාළ පාසලේ දේශනවලට 26 දෙනකු සහභාගි වූ බවට හඳුනාගෙන ඇති බවද අදාළ දේශන මඟින් මුස්ලිම් ධර්මය, ද්‍රවිඩ භාෂාව, ගණිතය හා කුරානය පිළිබඳ දේශන පවත්වා ඇති බවට දරුවන් ප්‍රකාශ කර ඇති බවද ඊට අමතරව අවි පුහුණුව සම්බන්ධ පුහුණුව, දරුවන්ගේ වයස් සීමාවට එහා ගිය මිලිටරිකරණය ඇතුළත් දේශන එම පාසල මඟින් ඊට අමතරව දරුවන්ට ලබාදී ඇති අවි ආයුධ පුහුණුවීම් අතරතුර පූර්ණ ලෙස මනුෂ්‍යයන් ඝාතනය කිරීම වැනි සමාජය කෙරෙහි වෛරයක් ඇති කිරීමේ අදහස් ඇතිවෙන දේශන පැවැත්වූ බවට කරුණු අනාවරණය වී ඇති බවද සොලිසිටර් ජනරාල්වරයා ප්‍රකාශ කර සිටියේය.

එම පාසලේ මරාගෙන මැරෙන බෝම්බකරුවන් වූ මොහොමඩ් ඊබ්‍රහිම් දුෂ්‍යාත් අහමඩ් මොහොමඩ් ඊබ්‍රහිම් ඉල්හාම් අහමඩ් යන අය දේශන පවත්වා ඇති බවට කරුණු අනාවරණය වී ඇති බවද නියෝජ්‍ය සොලිසිටර් ජනරාල් දිලීප පීරිස් මහතා අධිකරණය හමුවේ ප්‍රකාශ කරනු ලැබිණි.

අදාළ මද්‍රාසා පාසල ‘මොහොමඩ් රිකාස්’ නමැති මවුලවිවරයකුගේ ප්‍රධානත්වයෙන් ආරම්භ කර ඇති බවද නියෝජ්‍ය සොලිසිටර් ජනරාල්වරයා ප්‍රකාශ කළ අතර බෝම්බකරුවන් දෙදෙනා සමඟ නීතිඥ හිජාස් හිස්බුල්ලා යන අය සන්නිවේදන කටයුතු කළ බවට සැකකෙරෙන ජංගම දුරකථන 9ක් සහ එම ජංගම දුරකථනවලට භාවිත කළ අංක 7ක් අපරාධ පරීක්ෂණ දෙපාර්තමේන්තුව අනාවරණය කරගෙන ඇති බවද එම දුරකථන 9න් එකක් වූ මිල අධික ඇපල් වර්ගයේ දුරකථනයක් අලාභ හානි වූයේ යැයි නීතිඥ හිජාස් හිස්බුල්ලා යන අය විනාශ කර කුණු බක්කියට දමා ඇති බවද එම දුරකථනය සහිත කුණු බක්කිය කොළඹ නගර සභාව විසින් රැගෙන ගොස් ඇති බවට කරුණු අනාවරණය වී ඇති බවද නියෝජ්‍ය සොලිසිටර් ජනරාල්වරයා අධිකරණය හමුවේ ප්‍රකාශ කර සිටියේය.

විනාශ කරන කාලසීමාවේ වගකීමක් සහිතව තිබූ අදාළ ජංගම දුරකථනය විනාශ කිරීම ගැටලු සහගත බවද අදාළ මද්‍රාසා පාසලට දරුවන් බඳවා ගැනීම සඳහා නීතිඥ හිජාස් හිස්බුල්ලා යන අය ගෙයින් ගෙට ගොස් ඇති බවද අදාළ පාසලට කොළඹ 14 -15 යන ප්‍රදේශවලින් දරුවන් බඳවාගෙන ඇති බවද නියෝජ්‍ය සොලිසිටර් ජනරාල්වරයා වැඩිදුරටත් ප්‍රකාශ කර සිටියේය.

එම දරුවන්ගේ ලිපිනයන් ඇතුළු ලබාදී ඇති භෞතික විස්තර සාවද්‍ය බවට හෙළි වී ඇති බවද නියෝජ්‍ය සොලිසිටර් ජනරාල්වරයා ප්‍රකාශ කර සිටි අතර අදාළ පාසල තුළදී පැවැත්වූ දේශන මඟින් හිජාස් හිස්බුල්ලා යන අය තමන් මෙන් නීතිඥවරයකු වීමට හැකියාව ඇති බවට දරුවන්ට ප්‍රකාශ කර ඇති බවද එලෙසම අසාධාරණ සමාජය ඊට ඉඩ නොදෙන බව ප්‍රකාශ කර ඇති බවද නියෝජ්‍ය සොලිසිටර් ජනරාල් දිලීප පීරිස් මහතා අධිකරණය හමුවේ වැඩිදුරටත් කරුණු දන්වා සිටියේය.

අමිල අබේරත්න
Source - මව්බිම