Apr
26
හදිසි තත්ත්වයන් ගොඩදාන්න හමුදාව සූදානම් කරන්න ජනපති ෆොන්සේකාගෙන් ඉල්ලයි
ප්‍රධාන වශයෙන් අංශ කිහිපයක විනය ගොඩනැංවීම අරමුණු කර ගනිමින් සරත් ෆොන්සේකා මහතාට මෙම තනතුර ලබාදම කෙරෙහි අවධානය යොමුවී ඇති බව හෙතෙම කියා සිටියේ අද (26) කැබිනට් තීරණ දැනුම්දීමේ මාධ්‍ය හමුවේදීය.
මේ සම්බන්ධයෙන් අද දෙරණ කළ විමසුමකට ප්‍රතිචාර දක්වමින් ප්‍රාදේශීය සංවර්ධන අමාත්‍ය, ෆීල්ඩ් මාර්ෂල් සරත් ෆොන්සේකා මහතා කියා සිටියේ ඊයේ පැවති කැබිනට් රැස්වීමේදී ජනාධිපතිවරයා මේ සම්බන්ධයෙන් තමාගෙන් විමසූ බවයි.
අත්‍යවශ්‍ය සේවා පවත්වාගෙනයාමේදී ඇතිවන කඩාකප්පල්කාරී තත්ත්වයන් ඇතිවීමේදී හා වෙනත් හදිසි තත්ත්වයන් යටතේ ඇතිවන ගැටළු විසඳීමේදී යම් කිසි සංවිධානයක් ගොඩනැඟුවහොත් එහි වගකීම බාරගෙන කටයුතු කරගෙන යා හැකිදැයි එහිදී ජනාධිපතිවරයා විමසා සිටිය බව ෆොන්සේකා මහතා සඳහන් කළේය.
අමාත්‍ය ධූරයෙ සිටින අතරවාරයේ අමතර වගකීමක් ලෙස එය පැවරීම පිළිබඳ අවධානය යොමු කළද, ඊට අදාළ නිසි ක්‍රමවේදයක් සාකච්ඡා නොකළ බවත්, ඒ සම්බන්ධයෙන් ජනාධිපතිවරයා විසින‍් නිශ්චිත උපදෙස් ලබා නොදුන් බවත් ඔහු පෙන්වා දුන්නේය.
රටේ සාමාන්‍ය පරිපාලන කටයුතු පවත්වාගෙන යාමේදී ඒවා කඩා කප්පල් කිරීමට නොයෙකුත් දේශපාලන අනුදැනුම මත ඇතැම් පිරිස් පියවර ගන්නේනම්, රජයේ ක්‍රියාකලාපයන් ට එමගින් බාධා පැමිණෙන්නේනම් , රටේ සාමාන්‍ය පරිපාලන සේවා පවත්වාගෙන යාමට එය බාධාවක් බව ෆොන්සේකා මහතා මෙහිදී වැඩිදුරටත් කියා සිටියේය.
