සිය නිවසේ තනිවම ජීවත් වූ 83 හැවිරිදි තිදරු මවකගේ පිළිස්සුනු මළ සිරුරක් ඊයේ (24 දා) දින අළුයම දඔගස්ආර ප‍්‍රදේශයේ ඇයගේ නිවස ඉදිරිපිට මිදුලේ තිබී දික්වැල්ල පොලිසිය සොයාගෙන ඇත.

ලොකු හැන්නදිගේ හීන්නෝනා නමැති මෙම කාන්තාවගේ දියණියක් හා පුතුන් දෙදෙනකු පිට පළාත්වල වාසය කරන බව දික්වැල්ල පොලිසිය කියයි. මෙම නිවස ඉදිරිපිට මාර්ගයෙන් අළුයම 5.25 ට පමණ ගිය ප‍්‍රදේශවාසියකු මුලින්ම ගිනිගන්නා දෙයක් දැක බැලීමේදි බොහෝ සේ ගිනිගෙන තිබූ සිරුර දැක පොලිසියට දැනුම් දී ඇත.

ලීටරයේ හා ලීටර් භාගයේ භූමිතෙල් තිබුණු බවට විශ්වාස කරන බෝතල් දෙකක් හා කුප්පි ලාම්පුවක් නිවසේ ඉස්තොප්පුවේ කෙටි තාප්පයක් මත තිබී සොයාගෙන තිබේ. මහෙස්ත‍්‍රාත් පරීක්ෂණයක් සිදුකිරීමට නියමිත අතර කාන්තාව සියදිවි නසාගත්තාද යන්න පිළිබදව දික්වැල්ල පොලිසිය පරීක්ෂණ පවත්වයි.

දික්වැල්ල පොලිස් ස්ථානාධිපති ප‍්‍රධාන පොලිස් පරීක්ෂක ජී. පී. ටී. ඉෂාන් මහතාගේ උපදෙස් පරිදි විවිධ පැමිණිලි අංශයේ ස්ථානාධිපති සුදත් චන්ද්‍රකුමාර, උප පොලිස් පරීක්ෂක ජයසේකර යන මහත්වරුන්ගේ මෙහෙවීමෙන් පොලිස් සැරයන් (55983) ක‍්‍රිස්ටි මහතා පරීක්ෂණ පවත්වති. කොට්ඨාසයේ ග‍්‍රාම නිලධාරි ජේ . එම්. පී. චාමින්ද මහතාද සහභාගි වී සිටියේය.

නිමල් හේමසිරි