Jul
01
හෝමාගම නිවසක රහස් කුටියක තිබූ අවි ආයුධ සමග කාන්තාවක් අත්අඩංගුවට
හෝමාගම පිටිපන ප්‍රදේශයේ නිවසක රහස් කුටියක තිබී බොඩි ආමර් 2ක්, රිපීටර් ෂොට් ගන් 1ක් සමග ජීව උණ්ඩ, අත් බෝම්බ 7ක් සහ හඳුනා නොගත් උණ්ඩ 4ක් සමග කාන්තාවක් හෝමාගම පොලිස් ස්ථානයේ නිලධාරීන් කණ්ඩායමක් විසින් අත්අඩංගුවට ගනු ලැබ තිබේ.
පසුගිය ජූනි 29 වන දා ද ජයවර්ධනපුර පොලිස් විශේෂ කාර්ය බලකා කඳවුරේ නිලධාරීන් පිරිසක් විසින් කරන ලද සෝදිසි මෙහෙයුමකදී හෝමාගම පිටිපන ප්‍රදේශයේ පෞද්ගලික සමාගමකට අයත් ගොඩනැගිල්ලක තිබී ටී - 56 වර්ගයේ ගිනි අවි 11ක් සහ ටී - 81 ගිනි අවියක් සොයා ගැනිණි.
එම ගොඩනැගිල්ලේ අයිතිකරු සහ තවත් සැකකරුවෙක් ද එම සිද්ධියට අදාළව අත්අඩංගුවට ගනු ලැබූහ.
අත්අඩංගුවට ගත් එම ගොඩනැගිල්ලේ අයිතිකරු විසින් අනියම් සම්බන්ධතාවක් පැවැත්වූ බවට සැක කරන කාන්තාවකගේ නිවසේ රහස් කුටියක තිබී අද (ජූලි 01) හමුවූ අවිආයුධ සොයාගෙන තිබිණි.
ඒ, රාජ්‍ය බුද්ධි සේවා නිලධාරීන් විසින් ලබා දෙන ලද තොරතුරකට අනුවය.
සිද්ධිය සම්බන්ධයෙන් හෝමාගම පොලිසිය විසින් වැඩිදුර විමර්ශ පවත්වයි.
Source - මව්බිම
