Apr
26
කොරෝනා වෛරසය සාමාන්‍යයෙන් සම්ප්‍රේෂණය වන්නේ ආසාධිත පුද්ගලයකුගේ කිවිසුම් හෝ කැස්සේ දී පිටවන ශ්වසන ජල බිඳිති ඔස්සේ බව මේ වන විට තහවුරු වී ඇති අතර ද්‍රව්‍ය හෝ වස්තූන් මඟින් ද වෛරසය පැතිර යා හැකි බව මේ වනවිට සොයා ගෙන තිබේ.
ඇඳුම් ඇතුළු විවිධ ද්‍රව්‍යන්ගෙන් සාදන ලද පෘෂ්ඨයන් මත ද වෛරසය පැයේ සිට දින ගණන් සක්‍රීයව පැවතිය හැකිය.
කාඩ්බෝඩ්, ප්ලාස්ටික් සහ වානේ මත කොරෝනා වෛරසය කොපමණ කාලයක් පැවතිය හැකි දැයි මොන්ටානාහි ජාතික ආකස්මිකතා සහ බෝවන රෝග මධ්‍යස්ථානයේ පර්යේෂණ විසින් අධ්‍යනය කර ඇති නමුත් රෙදි පිළිබඳ තොරතුරු වැඩි දුරටත් අනාවරණය කර නොමැත.
සෞඛ්‍ය ආරක්ෂාව පිළිබඳ ජෝන් හොප්කින්ස් විශ්වවිද්‍යාලය එය බොහෝ දුරට පාරසරික තත්ත්වන් මත රඳා පවතින බවත් උෂ්ණත්වය සහ ආර්ද්‍රතාවය වෛරසයේ වර්ධනයට බලපාන බව සඳහන් කරයි.
වෛරසය ප්ලාස්ටික් සහ වානේ මත දින තුනකට පසුත් කාඩ්බෝඩ් මත පැය 24 හා තඹ මත පැය හතරක් ක්‍රියා කළ හැකි බව ද ඇතැම් පර්යේෂණයන් පෙන්වා දේ.
එමෙන්ම අප අඳින ඇඳුම්වල බොත්තම් සහ සිපර් මත වෛරසය රැඳී තිබිය හැකිය.
කණගාටුවනවාට වඩා ආරක්ෂාවීම සෑම අතින්ම යහපත් බැවින් ඇඳුම් මඟින් කොරෝනා වෛරසයට නිරාවරණය වීමේ දී අවධානම අඩු කිරීම සඳහා පියවර ගැනීම වැදගත් ය.
පිටතට යනවිට ටීෂර්ට් ගවුම් වැනි ඇඳුම් ඇඳීමේ දී සැලකිලිමත් විය යුතු බව වෛද්‍යවරුන් ප්‍රකාශ කරන්නේ එබැවිනි. ටී ෂර්ට් ගවුම් වැනි ඇඳුම් ඉවත් කිරීමේ දී ඒවා මුහුණට සහ නාසයට සෘජුව ස්පර්ශ වන බැවින් වෛරසය ශරීරගත වීමේ අවධානමක් පැවතිය හැකිය. මේ කාල සීමාවේ පිටතය යන විට බොත්තම් සහිත පහසුවෙන් ගලවා ඉවත් කළ හැකි ෂර්ට්, බ්ලවුස් වැනි ඇඳුම් වඩා සුදුසු බව වෛද්‍ය මතය වී තිබේ.
එමෙන්ම ඇඳුම් සෝදා පිරිසිදු කර ගැනීමේ දී නිවසේ කිසිවකුට වෛරසය ධනාත්මක වී නොමැති නම් හෝ රෝග ලක්ෂණ පෙන්නුම් කරන්නේ නොමැති නම් සාමාන්‍ය පරිදි එම ඇඳුම් පිරිසිදු කළ හැකිය.
නමුත් ඔබ ප්‍රසිද්ධියේ සාප්පු සවාරි ගොස් ඇත්නම් සමාජ දුරස්ථකරණයේ මාර්ගෝපදේශ පිළිපැද නොමැති නම් ඒවා සෝදන යන්ත්‍රයට දමා පිරිසිදු කර ගැනීම වඩා සුදුසුවේ. ඉදිරියේ දී පාසල් ආරම්භ කළ විට ගැහැණු දරුවන්ගේ පාසල් නිල ඇඳුම් සම්බන්ධයෙන් ද මෙම ගැටලු පැන නැගිය හැකි බව වෛද්‍යවරුන් පෙන්වා දෙයි.
