මෙරට හිටපු අග්‍රාමාත්‍යවරයෙකු මෙන්ම ජ්‍යෙෂ්ඨ දේශපාලනඥයෙකු වන රත්නසිරි වික්‍රමනායක මහතා අභාවප්‍රාප්ත වී තිබේ.

අසනීප තත්ත්වයක් හේතුවෙන්  කොළඹ පෞද්ගලික රෝහලක ප්‍රතිකාර ලබමින් සිටියදී ඒ මහතා මීට ටික වේලාවකට පෙර අභාවප්‍රාප්ත වී ඇත.


මියයන විට ඒ මහතාගේ වයස අවුරුදු 83කි.

ශ්‍රී ලංකාවේ දැනට ජීවතුන් අතර සිටින ජ්‍යෙෂ්ඨතම දේශපාලඥයින් දෙදෙනාගෙන් අයෙකු ලෙස ඔහු සැලකුණු අතර අනෙක් දේශපාලනඥයා වන්නේ හිටපු තවත් අගමැතිවරයෙකු වන දිමූ ජයරත්න මහතාය.

ඒ අනූව හිටපු අග්‍රාමාත්‍ය  දිමු ජයරත්න මහතාද පසුගිය 20 වැනිදා රත්නසිරි වික්‍රමනායක මහතාගේ සුවදුක් බැලීම සඳහා ඔහු ප්‍රතිකාර ලබමින් සිටි රෝහලට ගොස් තිබුණි.

රත්නසිරි වික්‍රමනායක මහතා වත්මන් ජනාධිපති මෛත්‍රීපාල සිරිසේන මහතාගේ ජ්‍යෙෂ්ඨතම උපදේශකවරයෙක් වශයෙන් මෙන්ම නිදහස්  පක්ෂයේ අනුශාසකවරයෙක් ලෙසද කටයුතු කළේය.

ඒකාබද්ධ විපක්ෂය නියෝජනය කරන විදුර වික්‍රමනායක මහතා ඔහුගේ පුත්‍රයෙකි.

2005 වසරේදී මහින්ද රාජපක්ෂ මහතා බලයට පත්වූ පසු එවකට ආණ්ඩුවේ අගමැතිවරයා ලෙස රත්නසිරි වික්‍රමනායක මහතා කටයුතු කළ අතර 2010 වසරේදී නැවත මහින්ද රාජපක්ෂ මහතා බලයට පත්වූ පසු අගමැතිවරයා ලෙස පත්කරනු ලැබුවේ දිමූ ජයරත්න මහතාය.

රත්නසිරි වික්‍රමනායක මහතා 1933 මැයි මස 05 වැනිදා උපත ලැබීය.

ඔහු පළමු වතාවට අගමැති ධූරයට පත්වන්නේ 2000 වසරේදීය.

එනම් 2000 අගෝස්තු මස සිට 2001 දෙසැම්බර් මස දක්වාය.

ඒ එවකට වයස අවුරුදු 84ක් වත්ම සිරිමාවෝ බණ්ඩාරනායක මහත්මිය අග්‍රාමාත්‍ය ධුරයෙන් ඉල්ලා අස්වීමත් සමගය.

අනතුරුව 2005 වසරේදී මහින්ද රාජපක්ෂ මහතා ජනපති ලෙස තේරී පත්වූ පසු එම වසරේ නොවැම්බර් 21 දින දෙවන වතාවටත් මෙරට අග්‍රාමාත්‍යවරයෙකු ලෙස ඔහු දිවුරුම් දෙන ලදී.