Jan
27
ඉතිහාසයේ වැඩිම ණය ගෙවීම 2019දී
ලංකාවේ සමස්ත ණය බරතාවට 2005 වසරේ සිට 2014 දක්වා 233% කින් ඉහළ ගොස් ඇතැයි ද එම අමාත්‍යාංශය පවසයි. මුදල් අමාත්‍ය රවි කරුණානායක මහතාගේ අත්සනින් යුතුව නිකුත් කළ විශේෂ නිවේදනයක් මගින් අමාත්‍යාංශය මේ අදහස් පළ කර සිටියි.
මුදල් අමාත්‍යාංශය සඳහන් කරන ආකාරයට 2014 වනවිට මෙම ණයබරතාව රුපියල් බිලියන 7391 දක්වා ඉහළ ගොස් තිබේ. එහිදී විශේෂයෙන්ම 2005 වන විට රුපියල් බිලියන 2222 ක්ව පැවැති ශ්‍රී ලංකාවේ සමස්ත ණය බරතාවය වසර 5 කින් එනම් 2010 දී රුපියල් බිලියන 4590ක් ලෙසද සටහන් වූ බව අමාත්‍යාංශයේ අදහසයි.
මේ තත්ත්වයත් සමගම ශ්‍රී ලංකාව විදේශීය රටවලට ගෙවිය යුතු ණය වාරික සහ පොලිය වසරින් වසර වැඩිවෙමින් පවතියි. ඒ යටතේ 2016 දී විදේශ රටවලට රුපියල් බිලියන 269 ක මුදලක් ගෙවනු ලැබූ බව පෙන්වා දෙන මුදල් අමාත්‍යාංශය 2019 වසර වනවිට එම ණය ප්‍රමාණය දෙගුණයක් දක්වා වැඩිවී රුපියල් බිලියන 586ක් ණය සහ වාරික වශයෙන් ගෙවීමට සිදුවනු ඇති බවද පවසා සිටියි.
