Mar
06
අපේ කලා ලෝකෙ ජනප්‍රිය තරු සතුට හා දුකත් එක්ක තමන්ගේ ජීවිතය දෝලනය වන විදිය තමයි මෙහිදී කතා කරන්නේ.
නදීෂා සතුටයි දුකයි නිර්වචනය කරන්නේ කොහොමද?
අපි කැමති දේ ලැබිමේදී දැනෙන හැඟීම තමයි සතුට කියන්නේ. අකමැති දේ ලැබෙන කොට දැනෙන දේට තමයි දුක කියන්නේ.
කලාකාරියක් විදියට වැඩියෙන්ම සතුටු වූ හා දුක් වූ දවස් දෙක මතකද?
හා හා පුරා මාව රූපවාහිනියෙන් දැකපු දා තමයි ගොඩක් සතුටු වුණේ. දුක්වූ අවස්ථාවක් නම් නැහැ.
සාමාන්‍ය ජීවිතයේදී වැඩියෙන්ම සතුටු වූ හා දුක් වූ අවස්ථා මොනවාද?
ඔය දෙකම තවම උදාවෙලා නැහැ.
නදීෂට තියෙන්නේ කිසිම සතුටක්වත් දුකක්වත් නැති හිස්ම හිස් ජීවිතයක්නේ?
නැහැ. මම ජීවිතේ හැමදේම යථාර්ථවාදීව දකිනවා. ඒ හින්දා සතුටෙදී ඕනෑවට වඩා සතුටු වෙන්නෙත් නැහැ. දුකේදී මහ හඩින් හඬා වැටෙන්නෙත් නැහැ.
කොහොමද ඔය වගේ යථාර්ථවාදී චින්තනයක් ජීවිතයට එකතු වුණේ?
බෞද්ධ දර්ශනය තුළින්.
කවද ඉඳලද නදීෂා බෞද්ධ දර්ශනය තුළින් ජීවිතය දකින්න පටන් ගත්තේ?
අපිව පන්සල් යන්න හුරු කරවන්නෙ පුංචිම කාලෙදී. හැබැයි එතකොට අපි පන්සිල් පදවල තේරුම්වත් දන්නේ නැහැ. පන්සිල් පදවල තේරුම වටහා ගන්න මම උත්සාහ කළේ අවුරුදු 7දී විතර. ඊට පස්සේ ටිකෙන් ටික කාලයත් සමග බුදු දහම ගැන කියන්න ඒ ගැන හිතන්න එහි ගැඹුර වටහා ගන්න උත්සාහ කළා. මට හිතෙන්නේ මම තවම මේ ගැඹුරු දර්ශනය වටහා ගනිමින් ඉන්නේ.
එහෙනම් බුදු දහම තුළින් ජීවිතයට ලැබුණු සතුට ගැන මේ ලිපියෙන් කතා කරමු. ඒක අනෙක් අයට ආදර්ශයක් වේවි.
සෑම බෞද්ධයෙකුගේම අවසන් සතුට නිවන. ඒ තමයි උත්තරීතරම සතුට. බෞද්ධ ප්‍රතිපත්ති තුළින් එතැනට යන එක තමයි කළ යුත්තේ. ඒක දීර්ඝව විස්තර කළ යුත්තක්. තමා විසින්ම කළ යුතු දෙයක්.
නිවන සොයා යන නදීෂා නවීන විලාසිතාවෙන් සැරසිලා වේශ නිරූපණයෙන් රුව ඔපමට්ටම් කරගෙන සැහැල්ලුවෙන් ජීවිතය ගෙවන කෙනෙක්?
විශාඛා සිටුදුව සාර්ථක පවුල් දිවියක් ගෙවූ ගිහි කතක්. ඒත් ඇය සෝවාන් ඵල ලාභිනියක්. මම තවම සෝවාන් ඵලයට ඇවිත් නැහැ. මම නිළියක්. ඒ මගේ වෘත්තිය. ඒක හින්දා ලස්සනට අඳින එක, විලාසිතා කරන එක මගේ වෘත්තියේ කොටසක්. ඒක මගේ ආධ්‍යාත්මික ජීවිතය එක්ක පටලවා ගන්න එපා.
ඒත් අපි වටා ඉන්නා ලෝකය කෙනකුව මනින්නේ බාහිරව බලලා. ඒ ලෝකය නිවන කරා යන ගමනට නදීෂාව පරමාදර්ශයක් කර ගනීද නැත්නම් නදීෂගේ ප්‍රකාශය හෑල්ලු කරලා හිනාවෙයිද?
ඒක සිදුවන්නේ ඒ අයගේ මානසික මට්ටම අනුව. මට ඒක අදාළ නැහැ.
නදීශා ප්‍රබලවම සතුට අත් විඳි අවස්ථාවක් මතකද?
එක්තරා ස්වාමීන් වහන්සේ නමකගේ ජීවන රටාව දැක්කම මට පුදුමාකාර සතුටක් දැනුණා.
අනෙක් කෙනකු ගැන හිතලා වැඩිපුරම දුක්වූ අවස්ථාවකුත් ඇති...?
කූඹියෙක් වතුරට වැටිලා ඉන්නවා දැක්කත් මම දුක්වෙනවා. ඒ අතරින් ප්‍රබලම විශේෂ අවස්ථාවක් නම් නැහැ.
නදීෂා හින්දා වෙනත් කෙනකුට දුකක් විඳගන්නට වෙලාම නැද්ද?
මම දන්නේ නැහැ.
සතුටින් ජීවත් වෙන්න කැමති අයට ඒ සඳහා ගත යුතු ක්‍රියාමාර්ග සඳහා ඔබ දෙන උපදෙස මොකක්ද?
පන්සිල් පද පහ රැකගෙන ජීවත් වෙන්න. ජීවිතයේ සතුට තියෙන්නේ එතැන.
නදීෂාත් ඒ සතුට විඳිනවද? කවමදාවත් පන්සිල් පද පහෙන් එකක් බිඳලම නැද්ද?
කෝටියක් සංවර ශීලය රකින උපසම්පන්න භික්ෂුන් වහන්සේ කෙනකු අතින් පවා සිල් බිඳෙන අවස්ථා තියෙනවා. මගේ අතිනුත් සිල්පද බිඳී යන අවස්ථා තියෙනවා. ඊට පසුව මම ඒක හදා ගන්නවා. ඒ ජීවන රටාව මා කරා සතුට රැගෙන එනවා.
ආරියවංශ කුලතිලක
