ලෝචනාගේ පුංචි පැටියා දැන් මාස හතරක ලොක්කෙක්නේ. කොහොමද පුතා එක්ක ගෙවෙන ජීවිතේ..?

එයත් එක්ක ගෙවෙන ජීවිතේ හරිම ෂෝක්. එයා හරිම හුරතල්. එයත් එක්ක ඉන්න අපේ ගෙදර හැමෝම කැමැතියි. එයත් එක්ක ඉන්නකොට කාලය ගෙවෙනවා තේරෙන්නේ නැහැ. දැන් ඉතිං පුතාට මාස හතරක්. කාලෙත් ගෙවිලා ගියා. තේරුණේවත් නෑ.


පුතාගේ වැඩ රාජකාරි වෙන්නේ ලෝචනාගේ අතින්මද..?

බබාගේ කෑම හදන, කවන පොවන වැඩ, එයාව බලාගන්න වැඩ මම කරනවා. හැබැයි බබාව නාවන්නේ මගේ අම්මා. මොකද මම තාම එයාව නාවන්න බයයි. ආදරය වැඩිකමට තමයි එහෙම බය හිතෙන්නේ.

පවුලේ පළමුවැනි මුනුපුරා නිසා පුතාට වැඩි ආදරයක් ලැබෙනවත් ඇති නේද..?

අම්මෝ ඔව්. අපේ පැත්තෙන් පළමුවැනියටම ලැබුණු මුනුපුරා තමයි මෙයා. ඒ නිසා හැමෝම පුතාට ආදරෙයි. අම්මා, තාත්තා, ආච්චි, මගේ නංගි, නංගි බැඳපු මල්ලි ඒ හැමෝම එයාලගේම දරුවෙක් වගේ මගේ පුතාව බලාගන්නවා. පුතා හැමෝගෙම හුරතලේ වෙලා. එයාලා පුතාව බලාගන්න නිසා මට ලොකු බරක් දැනෙන්නේ නෑ.

පසුගිය දවස්වල හස්බන්ඩ් ලංකාවට ඇවිත් හිටපු නිසා පුතාගේ වැඩවලට හස්බන්ඩ්ගේ සපෝට් එකත් ලැබෙන්න ඇති..?

ඔව්. පුතා ලැබෙද්දි ලංකාවට ඇවිත් එයා ආයෙත් විදෙස් ගතවුණා. මාස තුනකට විතර පස්සේ තමයි ආයෙත් එයා ලංකාවට ආවේ. ලංකාවට ආවම පුතාගේ වැඩ එයා කැමැත්තෙන්ම කරනවා.

තාත්තා පුතාට ගොඩක් ආදරෙයි වගේ..?

අම්මෝ ඔව්. එයා ලංකාවේ හිටියේ නැතත් එයාට පුතාව වීඩියෝ කෝල්ස් අරන් පෙන්නන්න ඕනේ. පුතාගේ ෆොටෝස් යවන්න ඕන. එයාට පුළුවන් වුණ ගමන් ලංකාවට එන්නෙත් පුතා එක්ක ගෙවන කාලය එයාට වටින නිසා.

පුතා පවුලට එකතු වුණාට පස්සේ ලෝචනාගේ ජීවිතේ වෙනස් වෙලාද..?

මගේ ගතිගුණ, මගේ විදිය වෙනස් වෙලා නැහැ. බබාගේ වැඩ නිසා ඉස්සරට වඩා කාර්යබහුලයි. පුතා ලැබුණ දවසේ ඉඳන් මේ වෙනකල් මම එක දිගට නිදාගත්ත දවසක් නැහැ. නිදාගන්න ලැබෙන්නේ නම් ගොඩාක් අඩුවෙන්. කටුක ජීවිතයක් ගත කළත් පුතා දකිද්දි, එයා එක්ක ඉද්දි ඒ හැමදේම අමතක වෙලා යනවා.

ඒ කියන්නේ ලෝචනා සැහැල්ලුවෙන් විඳපු ජීවිතයට තිත වැටිලද..?

නෑ.. නෑ.. ඒ විනෝදය සැහැල්ලුව තාම මගේ ජීවිතේ තියෙනවා. හස්බන්ඩ් ලංකාවට ආවට පස්සේ අපි ටි්‍රප් ගියා. අපි පුතාවත් එක්ක ගියා. මම පුතාව වුණත් එක තැන තියන්න කැමැති නැහැ. එයාට ඒ දේවල් හුරු කරන්න ඕන. අපි විඳින විනෝදය සැහැල්ලුව අපි පුතාටත් දැන්ම ඉඳලම දෙනවා. එතකොට එයාටත් ජීවත් වෙන්න පහසුයි.

පුතාගේ නමත් දැන් කියමු..?

පුතාගේ නම නේදුල නවරත්න. නොයෙක් බැබළීම් ඇති කියන අර්ථය එන්න තමයි ඒ නම දැම්මේ.

කවුද නම දැම්මේ..?

චින්තා වික්‍රමසිංහ තමයි පුතාට නම තිබ්බේ. පුතාගේ හඳහනේ තිබ්බා එයා හැම පැත්තෙන්ම දක්ෂ ළමයෙක් වෙනවා කියලා. අපිට හදලා දුන්න නම් වලින් අපි මේ නමට ගොඩාක් කැමැති වුණා.

ලෝචනා හිතන විදියට පුතා මොන පැත්තෙන් බැබළෙයිද..?

ඒක දැන්මම කියන්න බෑ. කොහොම වුණත් එයා හැමෝටම ළැදි හොඳ දරුවෙක් වෙයි. හස්බන්ඩ්, මම ගොඩාක් ආගමට ළැදියි. ඉතිං එයත් අපි විදියටම හැදෙයි. ඒ වගේම හොඳ පාරක යයි.

අම්මා වගේ පුතත් දැන්මම රඟපාන්න අරගෙන නේද..?

වස්සානේ ප්‍රේමය ඩ්‍රාමා එකේ එයා රඟපෑවා. එයාට අපහසුතාවක් වෙන්නේ නෑ කියපු නිසා පුතාව නාට්‍යයට දුන්නා. නිතරම එහෙම වැඩවලට දෙන්න අදහසක් නැහැ. මොකද ඕනම අම්මා කෙනෙක් තාත්තා කෙනෙක් බලන්නේ දරුවගේ පහසුවනේ. එයාව සැපට තියන්න අපිත් කැමැතියි. එයාට අපහසුවක් නොවෙන දෙයක් නම් එයාව යොමුකරනවා. අපි එයාට හෙඳට උගන්නනවා. එයා යන්න ඕන පාර තෝරගනියි.

කවදාහරි පුතත් රංගන ක්ෂේත්‍රයට යන පාර තෝරා ගත්තොත් ලෝචනා කැමැති වෙනවද..?

මගේ හස්බන්ඩ් ප්‍රොඩියුසර් කෙනෙක්. මමත් ක්ෂේත්‍රයට සම්බන්ධ ක්ෂේත්‍රයට ආදරය කරන කෙනෙක්. ඉතිං පුතාත් රංගනයට ළැදි ඇති. මගේ වෘත්තිය නරකයි කියලා මම කියන්නේ නෑ. එයා මේ ක්ෂේත්‍රය තෝරගත්තොත් මම එපා කියන්නෙත් නෑ.

දැන් ලෝචනා ආයෙත් රඟපාන්නත් පටන් අරගෙනනේ..?

මීට අවුරුදු හතරකට පහකට විතර කලින් කරලා තිබ්බ නාට්‍යයක ඉතුරු වැඩ ටික කරන්න තිබ්බා. ඒකේ වැඩ පටන් ගත්තට පස්සේ තවත් වැඩ කරන්න සිද්ධ වුණා.

ෂූටිං ගියාම පුතාගෙන් දුරස්වෙලා ඉන්න පුළුවන්ද..?

හරිම අමාරුයි. මම වගේම මගේ ගෙදර අයත් පුතාව බලාගන්න නිසා තමයි මට ආයෙත් වැඩ කරන්න පුළුවන්. පවුලේ අයගේ හයියෙන් තමයි මම ඉන්නේ. ෂූටිං ගියත් මම වැඩ ඉවර වුණ ගමන් ගෙදර එන්න බලන්නේ. සමහර වෙලාවට සෙට්වලදි මට පරක්කු වෙනවා කියලා බැනගෙන ගෙදර එන්නේ. හැබැයි මට වැඩ කරන අයගෙනුත් ලොකු සහයෝගයක් ලැබෙනවා. ෂූටිං ගියත් ස්කයිප්වලින් පුතා එක්ක කතා කරනවා.

මොනවද පුංචි පවුලේ ඉදිරි සැලසුම්..?

ගොඩාක් දේවල් සැලසුම් කරගෙන නෑ. මේතාක් හැමදේම හොඳට වුණා වගේ ඉදිරියටත් හැමදේම හොඳින් සිද්ධවෙයි. ඉදිරියේදී හස්බන්ඩ් ගාවට පුතයි මමයි ගිහින් එන්නත් හිතාගෙන ඉන්නවා.

තිළිණි කෞශල්‍යා විජේසිංහ