කටුනායක බණ්ඩාරනායක අන්තර්ජාතික ගුවන් තොටුපළේ ප්‍රධාන පථම අලුත්වැඩඩියා කිරීමට තීරණය කර ඇති නිසා ලබන වසරේ ජනවාරි 6 වැනිදා සිට අප්‍රේල් 7 දක්වා මාස 3ක කාලයේදි පෙරවරු 8.30 සිට පස්වරු 4.30 දක්වා ගුවන් ගමන් ධාවනය නොකිරීමට බලධාරීන් තීරණය කර ඇත.

ප්‍රධාන ගුවන් ධාවන ඵතය වසර 30කින් කිසිදු අලුත්වැඩියාවක් කර නොමැති නිසා එම තීරණය ගෙන ඇත. වර්ෂ 1986 මේ ප්‍රධාන පථය ඉදිකළ පසුව ප්‍රධාන අලුත්වැඩියාවකට සැරසෙන මුල්ම අවස්ථාව මෙයයි.

දිවා කාලයේ සිදුකරනු ලබන සියලුම ගුවන් ගමන් කටයුතු අවලංගු කිරීමට නියමිතය. පස්වරු 4.30න් පසුව ගුවන් යානා වලට ගුවන් ගතවීමට අවස්ථාව සැලසේ.

මේ අලුත්වැඩියා කාලය අතරතුර මත්තල ගුවන් තොටුපොළ හදිසි ගොඩබෑම් සදහා භාවිතයට ගැනීමට නියමිතය.

අලුත්වැඩි සිදුකරන කාලය අතරතුර විවිධ ගුවන් සමාගම් ගුවන් ගමන් ධාවනය දිගටම පවත්වාගෙන යනවාද නැතිනම් ඒවා අවලංගු කරනවාද නොඑසේ නම් ඒවායේ කාලය වෙනස් කරනවාද යන්න ඒ ඒ සමාගම්වල තීරණයක් බව ගුවන් තොටුපොළ සහ ගුවන් සේවා අධිකාරියේ අධ්‍යක්ෂ ජනරාල් එච්.එම්.සී. නිමල්සිරි මහතා පැවැසීය.

ප්‍රතිසංස්කරණ කටයුතු සදහා සුදුසුම කාලය අදාළ කාලය බවත් විවිධ ගුවන් සේවා සමාගම් සමග සාකච්ඡා කර එම තීරණය ගත් බවත් නිමල්සිරි මහතා වැඩිදුරටත් කීවේය.

කටුනායක ගුවන් තොටුපොළ දිනකට යානා 170ක් මෙහෙයවන අතර ඒවා ගුවන් සේවා 24කට අයත් යානා 60කට ආසන්නව ගිය වසරේ ගුවන් යානා 61,537ක් මෙහෙයවා ඇති අතර, මේ වසරේ ජූනි වන විට යානා 33,347ක් මෙහෙයවා ඇත.